::: Mariano Heyden :::

Djadumingu 6 di yanuari 2008 Plaga di abeha ta pika hòmber mata WILLEMSTAD – Den fin di siman tabatin un otro kaso kaminda un plaga di abeha a ataka un persona. Ayera mainta un hòmber a bai limpia un tereno ku un loader na Westpunt. Na un dado momentu un plaga di abeha a atak’é. E la trata di skapa for di e atake di abeha bahando for di e loader pero e la bin dal su kabes na e tayer grandi di e loader. Aparentemente e la pèrdè konosementu loke a pone ku e la bira víktima fásil di e abehanan. E kaso a kousa konsternashon pasobra ta algun luna pasá ku abeha a pika un señora mata den santana di Barber. Na e okashon ei Gobièrnu di Kòrsou a anunsiá ku ta lanta un komishon pa wak kon a para ku e asuntu aki pero no a tende nada mas di e komishon. Masha hende a akudí na e sitio despues ku a logra saka e hòmber for di e área di mondi i bin ku ne kant’i kaminda. E hendenan a reklamá ku a dura mas ku un ora promé ku ambulans a yega na e sitio. E kaso sigur a kousa hopi prekupashon i ya kaba for di ayera por a tende diferente hende ta bisa ku asina aki no por sigui. E hòmber ku a haña e pikanan di abeha ta un persona di edat kaba. No tabata posibel haña sa su nòmber pero nan ta bisa ku e ta riba 80 aña di edat. E ta konosí komo un hende ku despues ku e la baha ku penshun ta yuda diferente hende limpia nan tereno. E limpiamentu di tereno di ayera sinembargo a result’e fatal. Hòmber asesiná na Ser’i Kandela WILLEMSTAD – Den fin di siman tabatin un kaso di asesinato na Ser’i Kandela kaminda un hòmber di edat a bira víktima di deskonosí (nan). Polis a haña informashon ku tabatin un hòmber morto den su kas ku un herida serio na su kabes. Ora polis a yega a resultá ku e kaso a pasa basta ratu pasá pero miéntras tantu tabatin diferente hende a drenta i Sali for di e kaso loke opviamente ta stroba e investigashon den e kaso aki. Polisnan a buska rondó di e kas i nan a bin topa un piki ku probablemente ta e opheto ku a usa den e kaso aki. Polis a nota tambe ku den esnan presente tabatin un persona ku ta aktua den forma sospechoso. Polis a pasa pa su detenshon pa mas interogashon. Testigunan a pasa ku aparentemente e hòmber a kobra su penshun siman pasa i e hende òf hendenan ku tabata enbolbí den e kaso aki aparentemente tabata mek riba e sèn ku e hòmber a kobra. A identifiká e víktima komo Mauricio Virgilio Concincion di 76 aña di edat. E persona ta un di e promé hendenan ku tabata biba den e área di Ser’i Kandela. Awendia e área a bira unu habitá, por sierto ku diferente konstrukshon ilegal. Ta e di dos asesinato di 2008 na Kòrsou. Anteriormente siman pasa un primu a tira su primu mata den un kaso ku a tuma lugá na Kas Abou. Den e kaso aki, e sospechoso a entrega na polis. Pa promé bes den 22 aña Curoil a pèrdè plaka WILLEMSTAD – Pa promé bes den 22 aña di eksistensha, e kompania Curoil a pèrdè plaka den 2007. Asina gerente general di e kompania Gensley Capella a informá den un enkuentro ku prensa. Curoil ta e kompania ku ta distribuí produktonan petrolero pa merkado di Kòrsou i ta bende kombustibel pa produkshon di awa i koriente ku Aqualectra. negativo, aki ta premirá un pèrdida di Ang 16 a 17 mion. Por atribuí e pèrdida aki kompletamente na e echo ku preisnan lokal no a wòrdu adaptá konforme fluktuashon di preis di merkado internashonal i Curoil so mester a karga ku e oumentonan di preis riba merkado internashonal resultando den un prefinansiamentu alrededor di Ang 75 mion. Di e suma aki 30 mion ta pa Aqualectra. No opstante e resultado positivo i e kresementu di e área di negoshi internashonal di Curoil kombiná ku interes risibí riba diferente invershon, e pèrdida riba merkado lokal ta di tal magnitut ku e resultado total di Curoil pa 2007 ta un pèrdida di Ang. 16 a 17 mion. UTS tabatin un bon aña den 2007 WILLEMSTAD – E kompania di telekomunikashon di Kòrsou, UTS tabatin un bon aña den 2007. Esei ta loke gerente general di e kompania Paul de Geus a duna di konosé den un enkuentro ku prensa. “E resultadonan di 2007 no ta konosí ainda pero nos ta nota un tendensha positivo manera e aña anterior. Esaki riba su mes no ta nifiká ku nos mester kai drumi riba nos laurelnan. Nos di UTS ta determiná pa kada dia traha duru pa mehorá nos servisio na e kliente, trese inovashon ku ta sirbi e nesesidat di e kliente i kontribuí na krea un mihó komunidat riba nos islanan. Tirando un bista bek riba 2007 por bisa ku den 2007 nos no a para ketu i a desplegá vários inisiativa i proyekto interesante. Proyektonan ku mester duna kontenido na nos lema di aportá na mehorá kalidat di bida di nos klientenan i komunidat. Pa nos ta importante pa sigui habri espasio pa hende por komuniká ku otro. Atraves di nos pakete di servisio nos ta determiná pa kòrta distansha i hasi ku famia, amigu, ruman i konosínan ta kada dia mas konektá ku otro. Kontrario na otronan nos meta no ta pa krusa e liña final promé. Pa nos ta importante ku kada inovashon ku nos introdusí ta kumpli ku e nesesidat i demanda di nos hendenan”, asina De Geus a bisa. Diferente parlamentario a anunsiá ku nan lo bòikotiá enkuentro ku Brinkman (PVV) WILLEMSTAD – Na apertura di e enkuentro parlamentario tradishonal di kuminsamentu di aña entre Antia, Ulanda i Aruba por spera un konfrontashon serio. E deklarashonnan ku e miembro di e delegashon Hero Brinkman a hasi den direkshon di Antia i su pueblo a kousa konsternashon tur kaminda. Mas serio ta ku Brinkman te awor no a bai di akuerdo pa revoká su palabranan. Esei por hinka e deliberashonnan den un impase serio pasobra diferente partido a anunsiá kaba ku nan lo no partisipá si Brinkman ta presente. E enkuentro parlamentario di e tres parlamentunan ta programa pa kuminsa awe mainta. MAN ta pidi Gobièrnu di Kòrsou para benta di number di outo pa 2008 WILLEMSTAD – Rònt Kòrsou ta papiando riba e plachi di number di outo pa 2008 ku a resultá un plachi hopi mahos. Esmas, hopi ta esnan ku tin krítika pasobra no por mira e plachi di leu loke sigur ta un estorbo pa kontròl den tráfiko i tambe por ehèmpel kontra atrako. Eilandsontvanger ku ta enkargá ku kobransa di number di outo ta bisa ku no por hasi nada mas komo ku ya kaba e plachinan a yega. Pero otronan ta bisa ku mester para e proseso te ora ku yega na un plachi number ku ta mas responsabel ku esun nobo. Miéntras tantu e miembro di MAN, Urvin Macaay ta bisa den un karta pa Gobièrnu di Kòrsou ku ta ku asombro i tristesa el a tuma nota di e plachi nobo di number pa outo pa aña 2008. “Asombrá paso mi no por imaginá mi kon un Gobièrnu por disidí pa trese algu asina defisiente komo plachi di number pa outo. Tristesa paso awe den aña 2008 ku mas nos mester ta madurá pa yega na un Pais Kòrsou nobo, tin polítikonan ta duna muestra di ku nan no ta sufisiente madurá pa atendé ku algu serio manera un plachi di number pa outo. No ta normal ku despues ku e komishon ku Gobièrnu a instalá pa diseñá e plachi di number nobo a presentá e plachi nobo pa aña 2008 un diputado ta proponé pa trese kambio riba e plachi djis pa pone kolo di su partido riba e plachi di number, sin tene kuenta ku efisiensia di e plachi di number. Un plachi di number ku mester sirbi komo algu pa identifiká outonan riba kaminda a para bira algu ku polítikonan ta purba hasi polítika infantil kuné, un bèrgwensa. Si bo mira, e plachi di number aki ta asina kompliká diseñá ku riba un distansia hopi kòrtiku bo no por mira ta di kual number di outo ta trata. Mi ta imaginá mi ku sigur pa nos Kuerponan di kontròl lo bira super difísil pa por hasi nan trabou riba kaya na un manera efisiente. Pa e motibu aki mi ta proponé na Gobièrnu pa e tuma e desishon pa para e repartishon di e plachi di number nobo aki i mantené pa aña 2008 e plachi di number bieu. Naturalmente Gobièrnu lo tin ku sòru pa esnan ku ya a deshasí di e plachi bieu risibí un ehemplar nobo”, asina Macaay ta bisa 66 tumba inskribí pa Festival di Tumba 2008 WILLEMSTAD – Kontrali na tur espektativa, 66 komposishon a inskribí pa e Festival di Tumba di e aña aki. Asina a Sali na kla despues ku e inskripshon a sera ayera nochi 7’or. Presidente di Asosashon di Músiko Manfred Feco Gomez a ekspresá satisfakshon pa e inskripshonnan aki pasobra sigur e ta duna realse na e hechu ku e aña aki tin masha poko tempu pa prepará. Por sierto ku Asosashon di Músiko a anunsiá ku e lo tin su mes orkesta ku lo kompañá diferente di e kantantenan durante e Festival di e aña aki. E anochinan preliminar di Festival di Tumba ta kuminsá dia 14, 15 i 16 di yanüari awor. E anochi final ta dia 18 di yanüari. Problema serio ku Air Traffic Control a stroba buelonan WILLEMSTAD – Ayera a surgi un problema serio ku e sistema di Air Traffic Control na Mahuma, Kòrsou. E problema serio aki a stroba tráfiko aéreo den e espasio aéreo grandi ku ta ser kontrolá for di Kòrsou. E interupshon tabatin konsekuensha tambe pa buelonan pa i for di Kòrsou i buelonan internashonal ku ta pasa den espasio aéreo di Antia. Minister di Tráfiko i Komunikashon Maurice Adriaens a konfirmá e problema ayera i a bisa ku a kuminsá un investigashon mesora ta kiko por a kousa e interupshon aki. Banda di esei a kuminsá traha tambe riba alternativanan pa di e forma ei suavisá e impakto di e situashon. E minister a bisa ku a kuminsá traha riba un sistema pa na promé lugá restablesé komunikashon interinsular i despues eventualmente konekshonnan internashonal. E minister a bisa ku ta trata di un problema serio ku nunka ántes a pasa, sigur pa loke ta trata e envergadura aki. E kaso ta den investigashon.
Notabel.com	Konferensia Anual di Hende Muhé na Kòrsou
Monologo di Vagina	Laga sa ku bo tei, sa ken ta ken i pa otronan sa na unda abo ta www.whoiswho.an registrashon di hende den komunidatnan antiano, karibense i na Ulanda
www.seksualidat.com Informashon sano riba sèks i tur loke ta relashoná ku sèks i na papiamentu	Puntra; haña sa! www.konseho.com Un komunidat riba internèt kompletamente na papiamentu pa abo por haña e informashon ku abo mester na papiamentu.

Djadumingu 6 di yanuari 2008